من أسهل الطرق اللي تقدر بيها توصل كل مصادر البيانات بتاعتك من أكتر من قناة في مكان واحد وكمان تتابع أدائك بشكل بصري وواضح هي استخدام looker studio . في المقال ده على منصة قرار هنعرض لكم نصايح مهمة لأي مسوق بيستخدم Looker Studio علشان يقدر يعمل لوحات بيانات (Dashboards) تكون منظمة وأسهل في الاستخدام.
كيفية إنشاء Dashboard على Looker Studio
1) ابدأ بتنظيم التقارير
لو بتبدأ في Looker Studio خليك فاهم إزاي تنظم مكونات التقرير. لو عندك حملات على كذا قناة (زي فيسبوك أو إنستجرام)، اقسم التقرير لصفحات كل صفحة لقناة. علشان الشكل يفضل ثابت، استخدم نفس العناوين، الألوان، واللوجو في كل الصفحات، وخليهم مكونات على مستوى التقرير علشان أي تعديل يتطبق تلقائي في باقي الصفحات.
2) استخدم المعاملات مع الحقول المحسوبة
النصيحة التانية عن حاجة اسمها (المعاملات) وخليني أوضح الأول معاناها، المعامل دا زي متغير بسيط بتديه للي بيتفرج على التقرير علشان يقدر يختار أو يغير في البيانات زي ما هو عايز. يعني يفلتر أو يغير طريقة الحساب. وده بيخلي التقرير تفاعلي وأسهل في الفهم. بس علشان المعاملات تشتغل صح لازم تستخدم معاها (حقول محسوبة) ودي بتخليك تطلع أرقام أو معلومات جديدة من البيانات اللي عندك.
3) قم بتشكيل أرقامك
رتب أرقامك علشان تبقى لوحة البيانات بتاعتك أسهل في الفهم لأن أوقات كتير بيكون في تقارير أو لوحات معلومات فيها حاجات كتير وده ممكن يتعب اللي بيقراها. يعني ببساطة بيكون فيها بيانات وأرقام كتير أوي لدرجة إن اللي بيشوفها مش عارف يركز في إيه بالظبط. علشان كده حاول تبسط الأرقام وتعرضها بطريقة واضحة وسهلة علشان اللي قدامك يقدر يفهم بسرعة من غير ما يتشتت.
4) دمج البيانات
بص يا سيدي دمج البيانات يعني إنك تاخد معلومات جاية من كذا مكان، وتجمعها كلها في جدول أو رسم بياني واحد علشان تقدر تشوف الصورة كاملة قدامك. زي لما يكون عندك فواتير من أكتر من محل وعايز تحطهم في جدول واحد علشان تعرف صرفت كام في المجمل.
وعلشان تقدر تدمج البيانات لازم تلاقي حاجة مشتركة بين كل المصادر دي – زي مثلاً التاريخ أو اسم الحملة – علشان تعرف تربطهم ببعض.
الميزة الحلوة في دمج البيانات إنه بيساعدك تعرف معلومات كتير بسرعة، وده بيخلي شغلك أسهل خصوصًا في برنامج Looker Studio.
يعني مثلًا لو بتعمل إعلان على أكتر من منصة – زي فيسبوك وجوجل ولينكد إن – كل واحدة فيهم بتسمي الفلوس اللي اتصرفت باسم مختلف. فبدل ما تتلخبط، تقدر تدمج كل الأرقام في مكان واحد وتعرف بالضبط صرفت كام وإيه اللي جاب نتيجة.
5) التنسيق الشرطي
التنسيق الشرطي يعني إنك تلون الأرقام أو البيانات في الجدول بطريقة أوتوماتيكية على حسب قيمتها. يعني مثلًا لو عندك جدول فيه مصاريف كل شهر ومصاريف شهر معين كانت زيادة عن الميزانية تقدر تخلي الرقم ده يبان بلون أحمر. ولو كان أقل من الميزانية ممكن تخليه بلون أخضر.
الحركة دي بتسهل عليك تلاحظ الحاجات الغريبة أو اللي مش طبيعية بسرعة من غير ما تدقق في كل رقم. ممكن تستخدمها في الجداول أو في الكروت اللي بتعرض بيها الأداء. يعني ببساطة دي طريقة بتخلي البيانات تتكلم لوحدها بمجرد ما تبص عليها.
6) استخدم مخطط (tell me)
لما تيجي تعرض تقرير أو نتائج حملة إعلانية، ساعات بتبعت التقارير دي لناس جوه الشركة أو بره ومش كل الناس دي بتكون فاهمة البيانات كويس أو تعرف تقرا الجداول والرسوم.
علشان كده في أداة لطيفة في لوكر أستوديو اسمها مخطط “أخبرني” أو (Tell me chart) دي بتخليك تكتب جمل بسيطة توضح أهم الأرقام أو النتائج في التقرير، وكمان الأرقام دي بتتحدث تلقائي حسب البيانات.
يعني بدل ما الشخص يقعد يحلل الأرقام هو هيقرأ جملة واضحة بتقوله مثلًا: (الإعلانات على فيسبوك جابت 3000 نقرة في الأسبوع اللي فات) والجملة دي بتتغير لو البيانات اتغيرت.
7) استخدم التعبيرات العادية (RegEx)
التعبيرات العادية أو اللي بنسميها بالإنجليزي (Regular Expressions) هي شوية رموز أو حروف بنستخدمها علشان ندور على كلمات معينة جوه نص أو نقطع النص ونطلع منه أجزاء أو حتى نغير كلام بكلام تاني.
يعني مثلًا لو عندك جملة طويلة، وعايز تطلع منها بس اسم المنتج أو المنطقة أو نوع الإعلان، التعبيرات العادية بتساعدك تعمل كده بسهولة ومن غير ما تقعد تدور بإيدك.
يعني باختصار التعبيرات العادية دي بتسهل عليك تفهم وتنظم الكلام اللي جاي من البيانات، خاصة لو كان الكلام ده متداخل أو طويل.
8) استخدم المخططات كمرشحات
في Looker Studio ممكن بسهولة تضيف فلاتر للتحكم من الشريط اللي فوق في الصفحة. كمان ممكن تستخدم المخططات نفسها كفلاتر. يعني لو ضغطت على حاجة معينة في المخطط زي بعد أو فئة من البيانات هيظهرلك بس البيانات اللي ليها علاقة باللي اخترته.
دي طريقة سهلة جدًا علشان تخلي التقرير بتاعك أسهل في الاستخدام، وتقدر تركز على البيانات اللي تهمك أكتر.
9) إنشاء الروابط والصور في الجداول
علشان تخلي لوحات المعلومات بتاعتك أسهل في القراءة وتقدر تلاقي الأفكار بسرعة هي إنك تضيف روابط وصور في الجداول.
أول حاجة لو عايز تضيف صورة أو فيديو مصغر هتحط رابط الصورة أو الفيديو في الجدول بتاعتك. بعد كده لو عايز الصورة تظهر بدل ما يظهر الرابط ككتابة هتعمل تغيير بسيط. هتضغط على أيقونة القلم وتختار من القائمة اللي هتطلع لك “نوع البيانات” وبعد كده تغير النوع من (رابط) لـ(صورة). بكده هتخلي الجداول بتاعتك أكثر وضوح وسهولة في التعامل.
في النهاية لو حابب تتعلم أكتر عن استخدام Looker Studio وتحسين مهاراتك في تحليل البيانات والتسويق، تقدر تشترك في منصة قرار للحصول على كورسات ودورات تدريبية متخصصة. مع منصة قرار هتقدر تعزز معرفتك وتطور مهاراتك في المجال ده بطريقة احترافية. ما تضيعش الفرصة وابدأ رحلتك نحو الاحتراف في عالم التسويق وتحليل البيانات!